Liquiça, 28 Abril 2025-Diretór Gabinete Relasaun Externa no Komunikasaun; Cesario da Silva Marques hamutuk ho ekipa hala’o sensiblizasaun kona-bá referénsia “ Enkuadramentus Legais APC” ba estrutura lideránsa suku Maumeta” iha edefísiu Suku Maumeta, Postu Administrativu Bazartete, Munisípiu Liquiça.
Objetivu husi sensibilizasaun ne’e atu fahe informasaun APC ninian ba estrutura Suku Maumeta kona-bá atendementu APC ninian iha terenu liga ba apoia emerjénsia nomós apoia rekoperasaun tuir referénsia enkuadramentus legais Autoridade Protesaun Sivíl ordena
Diretór Gabinete Relasaun Externa no Komunikasaun; Cesario da Silva Marques hateten suku sira mak sai alvu ba tarjetu atu dezimina informasaun kona-bá enkuadramentu legais ne’ebé gia Autoridade Protesaun Sivíl atu halo atendementu servisu iha baze liu-liu kona-bá dezastre.
“Alvu ka tarjetu ba Suku, primeiru iha anu ida ke liu ba 2023 no 2024, ami tama iha munisípiu ba Postu remata kontinua ba Suku dezimina informasaun kona-bá enkuadramentu legais ne’ebé gia Autoridade Protesaun Sivíl atu halo atendementu servisu iha baze liu-liu kona-bá dezastre sira ne’ebé komunidade sira hetan iha kraik oinsa atu bele hetan nia direitu lolos no oinsa atu bele garante autoridade lokal sir abele partilla informasaun sira ne’e to’o iha kraik” dehan Diretór Gabinete Relasaun Externa no Komunikasaun; Cesario da Silva Marques
Diretór GREC; Cesario da Silva Marques hatutan katak iha tinan 2025 ba oin Autoridade Protesaun Sivíl liu husi Gabinete Relasaun Externa no Komunikasaun sei halo sensibilizasaun enkuadramentu legais APC ba 452 Suku iha Timor laran tomak.
“Ita sei kobre tuir planu Autoridade Protesaun Sivíl ba iha Gabinete Relasaun Externa no Komunikasaun katak ita sei tarjetu ka kobre hotu ba 452 sukus ne’ebé iha Timor laran tomak para it abele hatene lolos katak direitu komunidade ninian mak hanesan ne’ebé no dever parte estadu nia parte mak ida ne’ebé” dehan Diretór Gabinete relasaun Externa no Komunikasaun Cesario da Silva Marques.
Autoridade Protesaun Sivíl Munisípiu dalaruma partilla ona lei baze Protesaun Sivíl maibé ita lori mai fali referénsia enkuadramentu legais Autoridade Protesaun Sivíl tamba iha ne’ebá iha nia xave lubuk ida hodi hatene kona-bá prosesu sira hodi hetan pakote emerjénsia no rekoperasaun hatutan Diretór GREC
Iha Fatin hanesan Reprezentante Sefe Suku Maumeta Arlindo Maria dos Santos atuál Xefe Aldeia Caimegohou hateten ba nia maluk xefe aldeia sira no estrutura sira presiza rona didi’ak nune’e bele hatutan ba ita nia komunidade
“ Ohin loron ida ne’e ita nia enkontru kona-bá dezastre nian ne’ebé mai husi APC, entaun ita hotu-hotu tenke rona halo didia’k ba fasilitador sira nune’e ita mós bele hatutan ba ita nia komunidade sira ne’ebé hela iha fatin afetadu ba risku sira tamba dezastre ita la espera” dehan Reprezentante Xefe Suku Maumeta Alindo Maria dos Santos
Programa sensibilizasaun Enkuadramentu legais APC ninian ne’e hetan partisipasaun husi konsellu suku Maumeta hamutuk nain 21 kompostu husi feto nain 7 no mane nain 14.
Sensibilizasaun ida ne’e sei hala’o iha Postu Administrativu Bazartete hamutuk 4 kompostu husi Suku Maumeta, Suku Dato, Suku Lauhata, Suku Mota-Ulun no suku Vatuvou husi Postu Administrativu Maubara, Munisípiu Liquiça.
Tuir planu sensibilizasaun enkuadramentus legais APC ninian iha Suku Maumeta ne’e sei hala’o durante loron rua hahú loron 28-29 fulan Abril tinan 2025.
Mateus da Costa Media APC