Perfíl Prezidente Autoridade proteÇÃO civil

Presidente Autoridade Proteção Civil,

Superintendente PNTL, Ismael da Costa Babo, Lic. Agr, M.Sc

Superintendente PNTL Ismael da Costa Babo ne’ebé hetan nomeasaun iha fulan Juñu 2022 husi Sua Ekselénsia Primeiro Ministro no Ministro do Interior, Sr.Taur Matan Ruak liuhusi Rezolusaun Governu nian, hodi lidera APC nu’udar Presidente APC nomós sai hanesan instituisaun Governu nian ida ne’ebé foun.

Instituisaun ida ne´e, hetan supervizaun husi Komandu Operasionál ba Komandante Operasionál Nasionál ida, Rejionál ida no Komadante Munisipál nain sanulu resin tolu (13), ne’ebé lidera servisu Protesaun Sivil iha teritóriu  Timor laran tomak. Alende ne’e, Gabinete Presidente APC iha mos gabinete tolu (3) ne’ebé suporta iha APC Nasionál mak hanesan: Gabinete ba  Relasaun Eksterna no Komunikasaun sira, Gabinete ba Inspesaun no Auditória Interna no Gabinete ba Planeamentu Estratéjiku no Asesória.

Iha Estrutura Orgánika ne’ebé defini ona tuir Dekrétu Lei, APC mós iha nia Diresaun Nasionál 5 ne’ebé kompostu husi: Diresaun Nasionál Bombeiros (DNB), Diresaun Nasionál Prevensaun Konflitu Komunitáriu (DNPCC), Diresaun Nasionál ba Jestaun Risku Dezastre (DNGRD), Diresaun Nasionál ba Jestaun Rekursu (DNGR), Diresaun Nasionál ba Seguransa nomós Protesaun ba Patrimóniu Públiku (DNSPPP), no Unidade Espesiál ida ba Sentru Formasaun. Ho ida ne’e, APC totaliza nia funsionáriu sira hamutuk nain 2468.

Molok atu asume kargu nu’udar Prezidente APC, uluk mós asume ona kargu nu’udar Diretór Nasionál ba Seguransa Rodoviária ne’ebé sai hanesan koordenadór ba proposta lejislativa sira ba asuntu kódigu estrada foun nomós lejislasaun hirak ne’ebé komplementa ba servisu integradu iha PNTL.

Ismael da Costa Babo asume ona mós kargu nu’udar Komandante ba Operasaun  Espesiál sira, Komandante ba Munisípiu Dili, Diretór Administrasaun no Planeamentu, Xefe Relasaun Internasionál sira nomós Adjuntu ba Komisáriu Operasaun nian, asume kargu mós nu’udar komandante ba Guarda Prezidensiál no Seguransa, Komandante ba ekipa seguransa ba Reprezentante Sekretáriu Jerál ONU nian (UNDSS) iha Rai Guine-Bissau, hodi akompaña Dr. José Manuel Ramos Horta.

Durante prosesu luta ba ukun rasik-an, sofreviviente masakre Santa Cruz 12 Novembru 1991 ne´e mos partisipa maka’as no ativa iha Frente Liberdade Juventude hodi luta hamutuk ho gerilléiru sira durante tinan 12 nia laran ba independénsia Timor-Leste nian.

Prezidente APC finaliza mestradu ba área Jestaun Seguránsa no Defeza ne’ebé hasai iha Universidade Gajah Mada iha Yogyakarta Indonesia nomós Lisensiatura iha área Agrikultura ba horti-kultura ne’ebé hasai iha Universidade Nasional Timor Lorosa´e (UNTL).

.