Lautém, 29 Abríl 2025 – Autoridade Protesaun Sivíl (APC) Munisípiu Lautém liu husi Gabinete Munisipál Rekuperasaun, entrega ona material rekuperasaun ba benefisiáriu afetada dezastre naturais hamutuk uma-kain 25 iha resintu APC Munisípiu Lautém.
Átividade distribuisaun material rekuperasaun ne’e, diretamente prezide husi Sua Exelénsia; Prezidente Autoridade Protesaun Sivíl Timor-Leste (APC-TL) Jesuíno dos Reis de Matos Carvalho, akompaña husi asesor Sekretariu Estadu Protesaun Sivíl no Xefe Departamentu Rekuperasaun Nasional Gustavo José Lopes, nomós Sekretáriu Munisipál Planeamentu no Investimentu Integradu excelentíssimo; Tiborsio dos Santos, Reprezentante Komandante PNTL Munisípiu Lautém, Administrador Postu Administrativu, inklui Xefe Suku no Xefe Aldeia sira.
Iha intervensaun husi reprezentante Prezidente Autoridade Munisipál Lautém; Tiborsio dos Santos, hato’o agradese wa’in ba guvernu sentral ne’ebé ho nia polítika.
“Liu husi APC lolo-liman hodi fo tulun ba ami-nia komunidade hamutuk uma-kain 25 ne’ebé sai vítima afetada dezastre naturais iha tinan 2023 no 2024 iha Munisípiu Lautém. Iha bibán ne’e, reprezentante Prezidente Autoridade Munisipál Lautém husu mós ba benefisiáriu na’in 25 ne’ebé hetan ona material rekuperasaun inklui orsamentu ‘mão de obra’ husi APC, atu konstrui fila-fali sira nia uma no labele uza hodi atende nesesidade seluk” dehan reprezentante Prezidente Autoridade Munisipál Lautém; Tiborsio dos Santos
Enkuantu iha intervensaun husi Sua Exelénsia Prezidente Autoridade Protesaun Sivíl Timor-Leste (APC-TL) Jesuíno dos Reis de Matos Carvalho, dala-uluk hato’o agradese wa’in ba Administrador Postu Administrativu sira, liu-liu na’i Xefe Suku no Xefe Aldeia sira, ne’ebé sempre kolabora no akompana funsionáriu no ajente APC Munisípiu Lautém sira, durante hala’o servisu iha prosesu rekolla dadus dezastre.
Bibán ne’e, Prezidente APC-TL Jesuíno dos Reis de Matos Carvalho, ’em nome’ Ministru Interior (MI), Sekretariu Estadu Protesaun Sivíl (SEPC) husu deskulpa ba inan-aman sira tanba hein prosesu hodi assesu ba material rekuperasaun ne’ebé lori tempu, liu-liu ba inan-aman sira ne’ebé sai vítima dezastre naturais iha tinan 2023 no 2024 nia laran.
Relasiona ho ida ne’e, Prezidente APC-TL Jesuíno dos Reis de Matos Carvalho, hateten mós ba benefisiáriu hamutuk uma-kain 25 katak,” ha’u fiar inan-aman sira imi nia uma ou hela fatin, balun ho esforsu rasik hadia ona, maibe nu’udar Prezidente APC-TL husu para depois inan-aman sira simu ona material rekuperasaun no orsamentu ‘mão de obra’ husi APC, atu bele utiliza halo kompleta-tán ba konstrui uma hodi hela, tanba ida ne’e mak estadu ezije hela ba ita-bo’ot sira atu halo tuir,” tenik Prezidente APC-TL.
Entretantu benefisiáriu hamutuk uma-kain 25 ne’ebé assesu ba material rekuperasaun husi APC Munisípiu Lautém, kompostu husi Postu Administrativu Lospalos, Lautém, Iliomar no Postu Administrativu Luro, ne’ebé iha kategória aat-totál rua (2), kategória aat-natoon iha neen (6) no kategória aat-kma’an iha 17.
Ildefonso Soares, Média APC Lautém.