Dili, 04 Abril 2023 – Hafoin liu hosi prosesu naruk, Kadetes Bombeiros foun nain 96 ne´ebe kompostu hosi Munisipiu Ermera, Liquisa no Manatuto simu posse liu hosi seremonia tomada posse ne´ebe partisipa hosi Sekretáriu Estadu Protesaun Civil, Eng. Joaquim Gusmão ho Komisáriu Displinár Komisaun Funsaun Públika (KFP), Fausto da Silva Freitas no Prezidenti Autoridade Proteção Civil (APC), Tersa (4/4/2023).
Sekretáriu Estadu Protesaun Sivil, Eng. Joaquim Gusmão hateten ho pose ba kadetes Bombeiros munisípiu Ermera, Likisa no Manatuto bele kompleta ona korpu Bombeiros iha munisípiu 12, inklui RAEOA.
“Orgullu tebes bele komplete korpu Bombeiros iha munisípiu 12 inklui RAEOA, só falta de’it mak Ataúro ne’ebé foin mak sai munisípiu,” dehan Sekretáriu Estadu iha nia diskursu.
Nia haktuir, “sai korpu bombeiros servisu boot iha oin liuliu Ermera udan boot Aisamtuku sira tohar sempre apoiu korpu bombeiros hosi Dili ho Aileu, iha Likisa sempre apoiu hosi Bombeiros Dili, no Manatuto mós hanesan, área luan kobre to’o tasi feto no tasi mane.”
Sekretáriu Estadu akresenta servisu Bombeiros la’os deit atu hamate ahi, Bombeiros sira-nia funsaun barak, inklui atua situasaun emerjénsia ba iha liga ba saúde nian.
Ezekutivu ne’e esplika Bombeiros sira-nia servisu iha munisípiu la’os servisu mesak, iha mos APC munisípiu ne´ebe sei servisu besik ho Autoridade munisípiu sira hodi halo planu emerjénsia ba responde ba situasaun dezastre.
Governante fó parabens ba ekipa juri ne’ebé fó forsa no dedikasaun bo´ot konsege rekruta korpu Bombeiros 96 hosi kandidatu besik rihun tolu resin, ida ne’e servisu ida ne’ebé boot tebes.
Iha fatin hanesan, Komisáriu Displinár KFP, Fausto da Silva Freitas husu ba kadetes Bombeiros foun hanesan jerasaun foun ba servidór estadu atu servi povu no nasaun ho di’ak.
“Atu fo hanoin ba kadeste bombeiros 96 hanesan jerasaun foun, ne’ebé sai ona servidór estadu tenke servi ho didiak, servi ho fuan, servisu ho laran,” dehan Komisáriu Fausto.
Reprezentante KFP apela ba emposadu sira atu labele ko’alia kór partidu iha instituisaun estadu, ko’alia politika servi estadu, politika administrasaun nian bele, maibé politika kor partidu nian, ne’e kuidadu.
Entertantu, Paulo Ramos Salsinha nu´udar kadetes Bombeiros hosi Munisipiu Liquisa prontu atu halo servisu ba nasaun.
“Ho laran tomak hau prontu servi hau nia rai no iha nebe deit iha Timor laran tomak,” komentariu Paulo Ramos.
“Nu´udar feto hau iha komitmentu hodi servi hau nia an mos nudar Bombeiros, tamba servisu ne´e laos ba mane deit,” Clotilde Soares Vasconchelos, kadetes Bombeiros Munisipiu Ermera.
Entretantu, emposadu hamutuk 96, inklui feto 10 no mane 86, hosi munisípiu Ermera 32, feto 3 no mane 29, munisípiu Likisa 32, feto 3, mane 29 no munisípiu Manatuto 32 feto 4 no mane 28.
Reportazem: Cipriano Mesquita