Dili, 12 Maiu 2025- Autoridade Protesaun Sivil liu husi porta voz Nelson Nunes de Orleans atuál Xefe Relasaun Esterna GREK-APC relata dadus dezastre naturais durante semana rua hahu husi loron 28 fulan Abril to’o 12 fulan Maiu tinan 2025 hamutuk 34 kobre munisípiu 7 inklui RAEOA no ema ida lakon vida.
Xefe Relasaun Esterna GREK-APC Nelson Nunes de Orleans esplika” durante semana rua rejiaun Timor-Leste normal akontese tipu dezastre hanesan, uma Estragus (9), anin sobu (4), anin bo’ot (4) be’e sae (20), ahi han uma (5), mate (1), vítima (1) lakon to’o agora seidauk hetan, kanek (2) prienxe kriteria (7), apoiu deit emerjensia (26), númeru ema afetadus (152), ema evakua (44),
Munisípiu ne’ebé afeta ba dezastre durante semana rua hanesan, Munisípiu Bobonaru, Liquiça, Manatuto, Manufahi, Viqueque, Baucau inklui RAEOA.
Entretantu munisípiu (6) hetan ona apoiu rekoperasaun hanesan munisipíu Aileu, Ainaro, Dili, Liquiça, Lautem no Manufahi no munisipíu (7) mak sei iha prosesu verfikasaun nia laran hanesan Ermera, Viqueque, Manatuto, Baucau, Bobonaru, Atauro inklui RAEOA.
“Oras ne’e dau-daun komunidade balún nafatin hela iha fatin ne’ebé mak risku ba dezastre nune’e mak Autoridade Protesaun Sivil liu husi Gabinete ba Relasaun Esterna no komunikasaun mós iha programa ida kona-ba sensibilizasaun enquadramentu legais kada munisípiu to’o Postu Administrativu ba Autoridade lokál sira oinsa atu fó informasaun ba komunidade sira atu labele hela iha fatin ne’ebé mak risku ba dezastre “. Hateten Nelson Nunes de Orleans.
Parte APC nomós komando APC Munisipiu ho Parseirus Relevante fornese asistensia emerjensia ba família afetadus sira mak hanesan ai-han no laos ai-han (food item & Non-food Item). Komando Operasional Autoridade Protesaun Sivil ( APC) Munisipiu sira sei kontinua halo hela levantamentu detaillus kona-ba sasan ne’ebe estragus no lakon.
#Média APC