Baucau, 05 Maio 2025- Komando Autoridade Protesaun Sivíl Munisípiu Baucau liu husi Korpo Bombeiros lidera husi Komandante Cristalina Fraga Correia hamutuk ho ekipa, apoiu komunidade Suku Larisula no Bahatata hodi buka tuir vitima Caetano de Almeida ho idade 65, ne’ebé lafaek tata iha loron 03 fulan Maio, tinan 2025, tuku 10:30 Otl, iha Aldeia Bibidae, Suku Larisula, Postu Administrativu Baguia, Munisípiu Baucau.
Tuir kronolojia husi reprezentante familia matebian Agusto de Almeida hateten, vitima sai husi uma atu ba natar maibé to’o iha mota Domailaira lafaek tata no iha momentu ne’e kedas lafaek lori tama ba mota bo’ot Kalawai, no nia rasik halai tuir vitima maibé lakonsege salva.
Aleinde família vítima Autoridade Lokal Xefe Suku Larisula Jorge de Almeida Gusmão lamenta tebes ho situasaun ne’ebé nia komunidade hasoru ho nune’e husu ba parte kompotente atu foti medida imediata hodi halo prevensaun tamba komunidade Suku Larisula moris iha risku laran.
Enkuantu iha fatin akontesimentu komunidade kontinua hala’o seremonia ritual hodi buka tuir vitima.
Natalia Guterres, Média APC Baucau