Lautém, 27 Maio 2025 – Dezastre inséndiu ne’e ohin akontese (27/05) iha oras tuku 11:07 OTL, iha área Hama-Moko ba vítima afetadu Agostinho Alves Ribeiro, husi aldeia Leuro, Suku Leuro, Postu Administrativu Lospalos, Munisípiu Lautém.
Relasiona ho akontesimentu inséndiu ne’e, Komandu Autoridade Protesaun Sivíl (APC) Munisípiu Lautém, simu informasaun através via-telefónika husi vítima ne’e rasik, ho nune’e liu husi intervensaun rápida Korpu Bombeiros Brigada-III ne’ebé lidera husi Teófilho Cristóvão de Almeida, imediatu dezlóka kedas ba fatin akontesimentu inséndiu ne’e hodi kombate ahi refere.
Iha tempu hanesan, ekipa APC liu husi Gabinete Munisipál Jestaun Risku Dezastre no Gabinete Munisipál Rekuperasaun ne’ebé lidera husi Olficâncio Palau. Flores, hala’o kedas asesmentu Agostinho Alves Ribeiro ne’ebé nia uma hetan inséndiu, ao mesmo tempo entrega pakote emerjénsia hanesan ai-han no la’os ai-han ba família vítima afetada ne’e.
Koná-bá kronolójia akontesimentu inséndiu ne’ebé APC Munisípiu Lautém asesu husi vítima Agostinho Alves Ribeiro katak, inséndiu ne’e mosu kauza husi sirkuitu eletrisidade. Enkuantu, inséndiu ne’e la-rezulta ema ruma kanek ou lakon vida, maibe rezulta uma vítima afetadu sai motuk inklui sasán uma-laran no ai-han hanesan; roupa, motor, laptop, batar bidón neen (6), inklui livru no kadernu labarik eskola sira nian estragus hotu.
Ildefonso Soares, Média APC Lautém