Liquiça, 03 Maio 2025- Autoridade protesaun Sivíl liu husi Gabinete Relasaun externa no Komunikasaun kontinua hala’o sensibilizasaun Referénsia Enkuadramentu legais Autoridade Protesaun Sivíl nian ba lideránsa no Konsellu Suku Lau-Hata, iha Sede Suku Lau-Hata, Postu Administrativu Bazartete, Munisípiu Liquiça, sexta-feira ne’e.
Iha atividade sensibilizasaun hateten katak APC liu husi GREC ho nia tarjetu kada tinan ba desiminasaun referénsia Enkuadramentu legais APC komesa iha tinan 2023 hahu husi Munisípiu hafoin iha tinan 2024 ba iha Postu Administrativu sira no tinan 2025 tarjetu kontinua ba suku sira tuir pedidu ne’ebé rekomenda husi Postu administrativu sira.
“2023 ita nia tarjetu iha Munisípiu, ita kobre hotu tiha ona, no 2024 ita ba iha Postu, fahe nafatin referénsia Enkuadramentus Legais Autoridade protesaun Sivíl ba iha Administrador sira. Mai iha tinan ida ne’e, ita nia tarjetu ne’e ba iha suku, tamba depende rekomendasoens mai husi postu katak tenki to’o iha suku” dehan Cesario da Silva Marques Diretór Gabinete Relasaun Externa no Komunikasaun.
Diretór Gabinete Relasaun Externa no Komunikasaun Cesario da Silva Marques esplika objetivu prinsipal ba desiminasaun referénsia Enkuadramentus legais Autoridade Protesaun Sivíl ba nai suku sira tamba nota katak sempre akontese naksala bainhira implementa lei sira la tuir matadalan ne’ebé iha.
“Objetivu transmite referénsia Enkuadramentus Legais Autoridade Protesaun Sivíl ba nain suku sira tamba ita nota katak iha buat balun ne’ebé ke lei koa’lia oin seluk mas ita nia distribuisaun sira ne’e dalaruma implementa oin seluk. Razaun ida ne’e mak ami hakarka mai para referénsia sira ne’e iha kedas nain sefe suku, xefe aldeia sira, delegadu no delegada sira, para sira mai karik tenki tuir ona deit ida ne’e”. esplika Diretór Gabinete Relasaun Externa no Komunikasaun Cesario da Silva Marques.
Iha fatin hanesan XefeSuku Lau-Hata Daniel dos Santos apresia tebes ba sorumutu ne’ebé hala’o husi Gabinete Relasaun Externa no Komunikasaun iha ninia suku tamba durante sira ladun intende didi’ak Autoridade Protesaun Sivíl nia Kna’ar.
“Primeiru ita apresia, ba sorumutu loron ohin ninian tamba ami durante ne’e ami ladun komprende didi’ak Autorodade protesaun Sivíl nia kna’ar liu-liu liga ba iha apoiu umanitária ba família sira ne’ebé mak hetan dezastre tamba uluk liu 2021 ba kraik ne’e mssi mak lidera depois de lei foun sai katak dezastre tutula iha Autoridade Protesaun Sivíl entaun ho formasaun ida ohin ami sente katak bele loke tan ami nia hanoin no komprende di’ak liu kona-bá papél Autoridade Protesaun Sivíl atu nune’e ba oin ita bele halo servisu hamutuk dia’k liu tan ” dehan Daniel dos Santos Xefe Suku Lau-Hata.
Iha biban ida ne’e Xefe suku Lau-Hata Daniel dos Santos rekomenda atu pakote emerjénsia presiza koordenasaun lideránsa komunitaria sira tamba tuir haruka katak autoridade lokal sira mós hola parte nudar ajente Autoridade Protesaun Sivíl.
Sensibilizasun reférensia enkuadramentu legais APC ninian ne’e ne’ebé ko’alia kona-bá papél no kna’ar autoridade protesaun sivíl nudar pilar terseiru husi lei seguransa nasionál hanesan F-FDTL no PNTL ne’ebé foku liu ba asuntu Protesaun Sivíl ka dezastre iha Timor-Leste ne’ebé lei atribui iha Kontituisaun RDTL artigu 147.
Atividade sensibilizasaun ne’e fasilita husi Diretór Gabinete Relasaun Extena no Komunikasaun hamutuk ho nia ekipa, ne’ebé laos ho partilla material sira maibé halo diversu no diskusaun grupu hodi bele intende partisipante sira nia memoria ba kaptasaun ba informasaun sira ne’ebé aprezenta no durante atividade lao partisipante sira husi mebru konsellu suku Lau-Hata tomak átivu teb-tebes.
Programa ida ne’e sai hanesan programa prioridade APC-GREC ninian hodi kontinua partilla informasaun sira ba h 452 sukus iha Timor laran hodi bele hatene knaar APC iha Timor-Leste.
Mateus da Costa Média APC-GREC hato’o reportajen.